ప్రభుత్వ భూములను తమకు ఇష్టమైన వారికి అప్పనంగా పందేరం చేసిన వ్యవహారం ఉభయ సభలనూ కుదిపేస్తోంది. శాసనసభలోనైతే వారం రోజులుగా ఈ అంశంపై చర్చ లేకుండానే రగడ జరుగుతోంది. వాస్తవానికి వైఎస్‌ బతికుండగానే, గత శానసభలో చాలాసార్లు భూపందేరంపై చర్చ జరిగింది. అప్పటి స్పీకర్‌ సురేష్‌రెడ్డి మీద టిడిపి అవిశ్వాస తీర్మానం పెట్టిన రోజున సుదీర్ఘంగా సాక్షిలో పెట్టుబడులపైనా చర్చ జరిగింది. మన 'ప్రజాస్వామ్యం'లో ఎన్ని చర్చలు జరిగినా దోషులపై పెద్దగా చర్యలుండవు. ఆ సంగతి ప్రజలకూ, పార్టీలకు తెలుసు. అసెంబ్లీ బడ్జెట్‌ సమావేశాల్లో మళ్లీ భూపందేరంపై చర్చకు టిడిపి పట్టుబట్టింది. జగన్‌కు హైకోర్టు, ఐటి నోటీసులు జారీ చేయడం, జగన్‌ కాంగ్రెస్‌ నుండి వీడటంతో మరొకసారి సెజ్‌లు, భూముల పందేరం తెరమీదికొచ్చింది. సమర్ధవంతంగా చర్చ జరిగి అక్రమార్కులను గుర్తించి చర్యలు తీసుకుంటే ఎవరూ కాదనరు. అలాగే ప్రభుత్వానికి ఆదాయం తీసుకొస్తే అందరికీ సమ్మతమే. కాని ఈ మొత్తం వ్యవహారంలో రాజకీయ లబ్ధి కోసం ప్రధాన పార్టీలు, నేతల పాకులాట రోత పుట్టిస్తోంది.
