మౌనమేలనోయి వివేకా!

అసెంబ్లీలో ఆరు రోజులుగా రైతుల గురించి చర్చ జరగడమో లేక ఆ అంశంపై చర్చించాలని ప్రతిపక్షాలు ఆందోళన చేయడమో జరిగాయి. మూడు రోజుల పాటు చర్చించాక ప్రభుత్వం తరఫున ముఖ్యమంత్రి కిరణ్‌కుమార్‌రెడ్డి, రెవెన్యూ మంత్రి రఘువీరారెడ్డి సమాధానం చెప్పారు. విశేషమేంటంటే రైతుల సమస్యపై వ్యవసాయ మంత్రి వైఎస్‌ వివేకానందరెడ్డి మాత్రం నోరు తెరవలేదు. సహజంగా రైతుల గురించి వ్యవసాయ మంత్రి మాట్లాడతారు. ఒకవేళ రెవెన్యూ మంత్రి, సిఎం మాట్లాడినప్పటికీ వ్యవసాయ మంత్రి ఏదోక సమయంలో జోక్యం చేసుకోవడం ఆనవాయితీ. వివేకా విషయంలో ఆ సంప్రదాయం అటకెక్కింది. అసెంబ్లీ సమావేశాల చివరి రోజు రసవత్తరంగా సభలో చర్చ జరుగుతుంటే వ్యవసాయ మంత్రి కానరాలేదు. జీరోఅవర్‌ సమయంలో శాసనసభలో తచ్చాడిన ఆయన ఆ తర్వాత మాయమయ్యారు. ఎమ్మెల్సీ అయిన వివేకాను కాంగ్రెస్‌ వ్యూహాత్మకంగా శాసనమండలిలో పార్టీ ఫ్లోర్‌ లీడర్‌గా నియమించింది. అందుకే మండలిలో ఆయన బిజీగా ఉన్నారేమోననుకుంటే పొరపాటే. మండలిలో రైతులపై ప్రత్యేకంగా చర్చించలేదు. 

శాసనసభలో రైతులకు సిఎం, రఘువీరా ప్యాకేజీ ప్రకటించారు కాబట్టి మండలిలో వివేకా ప్యాకేజీ ప్రకటించారా అంటే అదీ లేదు. అక్కడ మంత్రి జానారెడ్డి ప్యాకేజీ వివరాలు చదివి వినిపించారు. కిరణ్‌కుమార్‌, రఘువీరా వంటి వారు వైఎస్‌ పేరు చెప్పి ఆయన చెప్పిన విధంగా రైతు రాజ్యాన్ని కొనసాగిస్తామంటూ వైఎస్‌ మంత్రం జపించగా వివేకా మూగనోము పట్టారు. వైఎస్‌ ఆశయాలు సాధించడానికే వ్యవసాయ మంత్రి పదవి అధిష్టించానని చెప్పుకున్న వివేకా రైతు సమస్యలపై ఎందుకు గొంతెత్తలేదు? ఉద్దేశ పూర్వకంగానే ఆయన నోరు పెగల్లేదా లేక కాంగ్రెస్‌ పార్టీ ఆయనను దూరం పెట్టిందా? కొత్తగా మంత్రి అయ్యారు కనుక అనుభవం లేదని ముఖ్యమంత్రే మాట్లాడనివ్వలేదా?