చేనేత, జౌళి శాఖా మంత్రి శంకర్రావుకు నిజంగానే బెదిరింపు కాల్స్ వచ్చాయా? ఆ ఫోన్లకు మంత్రి భయపడ్డారా? మంత్రి ఫిర్యాదు చేసినా పోలీసులు పట్టించుకోలేదా?... వైఎస్ సిఎంగా ఉండగా శంకర్రావు తెరమరుగయ్యారనే చెప్పాలి. మంత్రి పదవి రాలేదని ఒకటి రెండుసార్లు అసంతృప్తి వ్యక్తం చేయడానికే పరిమితమయ్యారు. పెద్దగా అసెంబ్లీకి వచ్చింది కూడా లేదు. అప్పట్లో కాకా కుమారుడు వినోద్ కేబినెట్లో ఉన్నందున కాకా అల్లుడైన శంకర్రావును తీసుకోలేదని వార్తలొచ్చాయి. వైఎస్ చనిపోయాక సిఎల్పీని వేదికగా చేసుకొని వైఎస్, ఆయన కుటుంబంపై విమర్శలు చేసిన ఆయనకు గత డిసెంబర్లో జరిగిన మంత్రివర్గ విస్తరణలో బెర్తు దక్కింది. మంత్రి అయ్యాక కూడా సిఎల్పీలోనే ఆయన ఎక్కువగా ప్రెస్ కాన్ఫరెన్స్లు పెడుతున్నారు.
